VANRAM LEH HREMHMUN

Kristian inti, Isua zuitu nia inchhalte hian hremhmun hi an hre chiang lo em ni ang aw ka ti thin. Kristian Kohhran thenkhat rin dan chuan hremhmun hi thih hnua mi sualte(Isua ring lo mite) thlarau meia chatuana hremna niin an ruat a. Heng mite hian Isua ding lama an khenbeh ve hnena Isua thu sawi, 'Tih tak meuhin ka hrilh a che, vawiinah hian ka hnenah Paradis-ah i awm ve ang,' tia a chhanna hian awmzia a nei thuk viau mai thei a ni. Kohhran tlem zawk erawh chuan Isua ring duh lo mi sualte chu an thih hnua an thlarau chu chatuana meia kang tur ni loin, kang ral nghal vek turah an ruat ve thung a ni. Heti zawnga pawmtute tan erawh chuan a chunga Bible chang kan sawi tak khi a ziah dan a dabng leh deuh thei a ni. A hmasaah kha chuan, "Tih tak meuhin ka hrilh a che,' tih chinah hian coma(,) a awm a. A hnuhnung zawk ringtute Bible chhiar turah chuan, "Tih tak meuhin ka hrilh a che vawiinah hian, ka hnenah Paradis-sah i awm ve ang," tih a ni thung ang. A hawrawp chu inzat reng mah sela, thumal awmna pawh inthlakthleng chuang loin an awmna ngai theuhah la inrem thomah sela, comma (,) awmna a insawn hian a sawi tum a dang daih thei a ni. Engpawh ni rawh se, a hnuhnung zawk hi Bible zirtir dan ni zawk awm tak a ni. Isua khan Pathian ring lo mite chu chatuan nunna an nei lo a, chatuan boralnaah an kal tur thu a sawi tlat mai a. Sam ziak pawhin, 'Rei lo te achinah mi suaksual chu a awm tawh dawn si lo a; a ni, a awmna hmun chu en en mah la i hmu tawh lo ang," tiin a sawi a. Solomona pawhin, 'Mihring fate thlarau chu chung lamah a chho, emaw, ramsa thlarau chu hnuai lamah, leiah a chhuk emaw, tih tu nge hria? A hnua thil lo awm te rawn hmu turin tu nge rawn hruai kir leh hlei ang? a ti. Mihringte leh ramsate chu an thihin lei vaivutah an chang leh vek a ni tih a sawi chiang hle bawk a ni. Chuti a lo nih chuan mi sualte thlarau chu meidilah chatuana hrem lo ni dawn ta sela, mi felte ang bawka chatuan nunna nei an ni ve tho dawn tihna a ni a, Bible chang dang zawng zawng a kalh vek dawn tihna a ni nghal bawk ang. Chuti chuan, mi sualte hremna tur meidil chu chatuanin a awm reng a, a hrem tur mi sualte erawh chuan chatuan an daih lo thung a ni tihna a ni; a chhan chu, Hebrai ziaktu leh Mosia ziak chuan Pathian chu mi kan ral hmang mei a ni tih an sawi tlat avangin. Kan eirawng bawlna mei hi chu a ni lo tihna a nih chu. Hindu sakhuaah te, Zoarastrianism-ah te, Judaism-ah te leh Kristian sakhuaah te chuan thih hnua mi sual hremna a awm vek a ni awm e.

        Mizote sakhuaah chuan thih hnuah mi sual hremna a awm ve lo a, mi sual, mi dangte tana chimawm leh vangtlang tana hnawksak mi reng reng chu an thih hnua an thlarau ni loin, an tisa dam lai niah ngei an thil sual tih man chu an tel ang a, an thlah kal zel thleng pawehin an tihsual rah chu an seng thei bawk a ni. Entirna'n- Rannung manin lo sawisa ta la, thi si lo, dam si loin han awmtir reng ta la, i tihsual man chu i dam laia a rah i seng loh vek pawhin i chithlahah ngei khan a lang tho tho ang, chu chu chiang tak a ni. A nih loh leh i mihringpui ngei mi ang mang lo kha han tiduhdahin han sawisa ngat teh, i tihsual man chu a tak ngeiin i tel chiang ngawt ang. Chu chu a ni mai.

       Kristiante chuan Vanram an sawiah chuan Isua ringtute chu an thih hnuah an thlarau kalna turah an ruat a, khawvela an dam laia an awm lai ang bawka kan la inhre hrang nuaih ang hian Vanramah chuan la inhre hrang nuaih turah an inruat a, kan mihrinna ang hian, 'Saw saw chu mi kha mi chu a ni a, hei hi chu mi kha mi chu a ni,' tih ang hian la inhre turah an inruat a ni.

       Mizo sakhuaah erawh chuan mihring chu an thih hnuah chuan an thlarau chu Pathian hnenah kalin, Pathianah an chang leh vek dawn a ni. A chhan chu nausen lo piang hian Hu an nei nghal a, chu chu an nunna thaw chu a ni. An lo pian hnua naulaihrilh an hman a, bawrh an keu a, hming an neih hman a, Pathian hnena Puithiamin a hlan atang chiah khan Zing an nei ta nghal a, 'ZIng,' chu Pathian hnena mi thlarau a ni. Pathian hnena mi thlarau kha Khawzing Pathianin an thlarau atan a rawn pe a, chu tak chu an thih hnuah chuan Pathian hnena an kal khan mihringin an ding dawn lo a, Pathianin an ding dawn a ni. Mizo upa hla hlui tak pakhatah chuan,

       "A fam po po mual an khum,

        Thlanpial kawtah;

         Rihli tui an dawn hmasa,

         Pathian an chang,"

a ti tlat a ni. Chuvangin kan thih hnuah chuan mi sual an ni emaw, mi tha an ni emaw, Pathian hnen kan thlenin, mihring ni loin, Pathian bawk kan ni leh ang.