CHANCHIN ṬHAIN KAN RAMAH RAMHUAI A UM BO TA

       Y.M.A hlaah hian, “Chanchin ṭhain kan ramah ramhuai a um bo ta,” a ti a, Kristian kan nih hma khan kan Zoramah chuan ramhuai an tam hlein an sawi a, chungte chu Kristianna chanchin ṭha chuan min um bosakin chanchin ṭha engah chuan kum 100 chhung lekin hma kan sawn hlein an sawi a. Kristianna chanchin ṭha eng chu Zofate tan chuan malsawmna ropui tak niin an lo sawi hial si a, pawm dan tâwk thiam a har dawn a ni maw? Ramhuai sawi a tam ta lo viau bawkin a lang si.

                           Nia, “Chanchin ṭha eng,” tiin an lo sawi a, malsawmna zawng a ṭhen laiah chuan a ni ngei tak a. Mahse mingoho khan kristianna chanchin ṭha hi kan ramah rawn pu lût lo mah sela, kan kiang vêl hnamte pawhin hma an sâwn tho a, hmasâwn lo tawp chuan awm reng bîk thu awm suh. Min rawn hnaih lutuk a, kan ram an rawn lût a, min rawn nêk a, indo a lo ngai ta a. Kan indo a, sipai tam zawk leh râlthuam nei ṭha zawk bawk an nih avângin leh ṭanrual ve nachang kan hriat bawk si loh avângin kan ngam ta lo a ni.

                             Tharumin ngam lo mah ila, kan rilru an hmin lo tih an hriat avângin an sakhua Kristianna chu hmangin min rûn leh a, kan tlâwm ta duak duak mai a ni. Chutah, “|hen darh la, awp bet rawh,” tih thupui hmangin kan ram an ṭhen darh a, awp beh nuam tâwk chauh tûrin lehkha min zirtîr a, kan thiam sân erawh chu an hlau hle thung a ni. “Mingo an fing ber a, an huai ber,” tih chu min thiamtir a, mingo chu kan ngaisâng ta êm êm mai a. Kan sawi tawh ang khân tûn laia kan kohhran minister te meuh pawhin Kristiannain kan hnam nun a tihchhiat thu an aupui piap piap tawh pawhin kan la ṭan fo dâwn em ni?

                             Isuan tehkhin thu pakhat a sawi kha a dikzia a langin ka hre ṭhin a, “Ramhuai bawlhhlawh chu mi kawchhung ata a chhuahin, chawlhna zawngin tui awm lohnaa te a vâk a vâk a, a hmu ṭhîn si lo a. Tin, ‘Ka chhuahna inah khan ka kir leh mai ang,’ a ti a; tin, a va thlen chuan, ruaka, phiahfaia, cheimawiin a va hmu a. Chu veleh a va kal a, amah aia sual zawk ramhuai dang pasarih a rawn hruai a, chutah chuan an lût a, an awm reng ṭhin a; chu mihringa awmze hnuhnûng chu a hmasa aiin a lo ṭha lo zawk ṭhin a ni,” tih thu hi (Matt. 12:43-45; Luka 11:24-26). Kan ramah chanchin ṭhain ramhuai a um bo emaw kan tih lai hian, a aia sual zâwk ramhuai dang pasarih mai pawh ni loin, a nuaiha nuaih têl a rawn hruai lût zâwk a ang ta. Tûn hma lama sualnaah Kristian kan nih hmain eirûk, hlêprûk, rûkrûk, tualthah tih ang zawng zawng nichina kan sawi ang chi zawng zawngte kha a awm ngai hlei nem. Tualthah, uire, hmeichhe inzuar (K.S) ang chi te an awm kan hre lo. Tunah chuan, “Nuaihi te, Nuaiha te,” kan ni ta hlawm a nih hi. Ruihhlo lam chi nên kan ṭawp ta êm êm mai a ni.

                             Pu Rokûnga hla phuah kan sawi lai rau rau chuan tuna kan han sawi hla tlar khat te mai khan ngaihtuah a tithui deuhin ka hria a, Pu Rokunga hian a phuah dân dik tak hi kan hre chiang em aw? ka ti a.

                             “Chanchin ṭhain kan ramah ramhuai a um bo ta,”

                   ti khân i rawn sawi chhuak a, chu chu hlabu lama a chuan dân pawh  niin ka lo hre ve a. Pu Rokûnga hian a phuah dân hmangah hian, “Chanchin ṭha chuan ramhuai chu kan ramah a ûm bo nge ni a, kan rama ramhuai a um bo zawk aw?,” tiin zawhna a awm thei a ni. “Kan rama ramhuai a um bo...,” a ti lo a; “Kan ramah ramhuai a um bo,” a ti miau si a. “Chanchin ṭhain kan ramah ramhuai a um bo” a nih chuan, mi rama ramhuai awmho kha kan ram chhungah a ûm lût a nih loh vêk pawhin, kan ram chhûnga ramhuai awmte kha  um boin, kan ram chhûng khawi lai kil kilah emaw an thep bo vêl tihna a ni. “Kan rama ramhuai a um bo...,” tih ni sela chuan, “ kan ram chhûnga ramhuai awmho kha kan ram aṭanga ûm chhuakin an bo ta duak e,” tih anga sawi theih a ni ang. “...kan ramah ramhuai....,” tia hlabua lo inziak hi Pu Rokunga phuah dan reng nge ni a, a bu siamtute siam danglam? tih chu kan hre thei ta si lo a. Engpawh ni sela,

                             “Chanchin ṭhain kan ramah ramhuai a um bo ta,”

                   tih chu a dik dân zâwk a lo ni a ni ang chu, kan ramah ramhuai chi hran hran an tam êm êm dânah hian.