56. Zawhna :
Chuti chu Israel thlah kan ni lo reng reng i tihna a ni maw?
Chhanna : Ni e, Israel thlah chu sawi loh, Adama
thlah pawh kan ni ve lo a ni. A hmaa kan sawi tawh ang khan Israel thlah kan ni
lo a, a chhan chu Israel ram chu B.C 722 kumah Assuria lal Salmanesser-a chuan
runin a hneh a, salah a hruai bo ta hlawm kha a ni a. Chu mi hun hma daih B.C
770 kum emaw, a hnu lam hretah emaw Chinese mi thiamte’n a thlan an hai chhuah
Zo mi ṭhapa emaw kha a thi tihna a ni a, chu chuan Israel hnam leh Juda hnam
chu Kanan rama an la awm khawm vek lai pawh khan Mizo pi leh pute chu China ramah
an lo awm daih tih a tichiang em em a ni.
Chu
mai pawh a la ni lo a, kum tam tak kal ta B.C. 8000 vel laia Kom hnam chanchin
ziaktu pakhat chuan mihring siam hla Pu Sobuia’n B.C 2000 kum vela a lo phuah a
tarlang nghe nghe a. Chu hla chu-
“Mi
inthan ka hril tang ning la ja-ah,
A
kung hrui chhui tang ning la ja-ah;
Minu
leh mipa aw lei ranot sei a,
Mi
inthawkna ti tang ning e ja-ah,”
tih
a ni. He hla hi B.C. 2000 vela phuah a ni daih tawh si a, chung hunah te chuan
Israel hming pawh a la awm lo a, an thlahtu, he hming petu ber Israel-a pawh a
la piang lo reng reng a ni. Chu vang chuan Israel thlah chu kan ni lo chiang
bal ti ila, kan tisual lo ang (Mizo Chanchin - Col. V. Lunghnema p. 210)
57. Zawhna : A
nih leh nichin lawk maiah khan Adama thlah pawh kan ni lo tih kha i sawi lang
zauhin ka hria, i ti em ni kha?
Chhanna : Aw, ti e; ka sawi ngei alawm. Adama thlahah
chuan keini Zo hnamho zawng zawngte hi chhiar theih loh vek kan ni. Khawvela
mihringa a tlem zawk takte hi Adama thlaha chhiar theih an ni chauh ang.
58. Zawhna :
Chuti angin Khawvel mihring hi Adama thlah ni lo awm thei turah ka lo ruat hlei
nem, Bible hian mihring piang chhuak tawh reng reng chu Adama leh Evi thlah ni
vek tur angin a ziak si a.
Chhanna : Ni e ti rawh. Bible ziak aṭanga a lan dan
chuan Adama thlah vek ni awm tak a ni a. “Mihring hmasa ber Adama chu mi
nung a lo ni,” tih te (I kor. 15:45); “Adamaah chuan mi zawng zawng an thi ṭhin...,”
tih te (I Kor. 15:22) kan hmu a. Mihringte chunga thihna lo thleng ṭhin
pawh hi Adama anchhia kha niin (Gen. 3:17),
“Vaivut i ni a, vaivutah vek i kir leh tur a ni,” Pathiain a tih vanga
thi ṭhin kan niin an sawi a (Gen. 3:19). Mahse Bible châng dang hi han en ve
leh ila. Adama chuan a nupui a pâwl a, a lo rai chuan Kaina a hring a tih kan
hmu a (Gen. 4:1). Tin, Evi chuan a nau Abela a hring leh tih kan hmu bawk a
(Gen. 4:2). Kaina’n a nau Abela a thah khan (Gen. 4:8) Pathian chuan Kaina chu
anchhe dawng a nih thu a hrilh a (Gen. 4:11), “Leiah hian tlan bo leh vakvai
i lo ni tawh ang,” a ti a (Gen. 4:12). Pathianin Kaina chungchang chuti
anga a han puan chuan Kaina chuan mi thah a hlau ta a nih chu (Gen. 4:14).
He
lai thu hi han chhui zui dawn ta ila. Adama chu mihring hmasa ber lo ni ta
sela. A fate pahnih chuan an farnute lo chu nupuia neih tur tu nge awm chuang
ang. An farnute tan pawh an nuṭate lo chu tute nge pasalah an neih chuan ang
le? Chu vangin Kaina chuan, “Tupawh mi hmu apiangin mi that mai ang?” a tih
khan amah hringtute thah nge a hlauh a, a pianpui unaute thah nge a hlauh, an
fate thah? Chuti ang a nih loh a, an thisen zawmpui hnaivai takte ni lo mi dang
thah a hlau a nih erawh chuan, Adama chu mihring hmasa ber a ni lo a, Adama
fate leh a thlahte ni lo mihring dang an awm tihna a ni.
A
pahnihnaah chuan, “Hei hi Adama thlahte chuanna lehkhabu chu a ni,” tih ziak
kan hmu leh a (Gen. 5:1). Adama thlahte chuanna lehkhabuah chuan mi dang
thlahte (Adama thlah ni ve lote) chanchin chu a ziak tel lo ang tih chu a rin
hriat theih nghal mai a. Adama chuan a
fapa pathumna Setha a neih hnu chuan Kum 800 la damin fanu leh fapa te a nei
leh tih kan hmu a (Gen. 5:4). Chutichuan Genesis pawh hian Adama thlahte
chanchin a ziahnaah chuan a chhui vek seng tawh si lo a, a sawr zim chho tial
tial a, a tawp lamah chuan khawvel tlantu nia an ruat Isua krista lo pian
chhuahna hnam Juda hnam leh Levi hnamah a hmawr a bawk a ni ta ber a ni.
Chutichuan, he lehkhabu (Genesis) hi Adama thlahte chuanna chu a ni a, Bible-a
bu dang chuang zawng zawngah pawh Adama
thlahte chuanna lehkhabu Genesis-a mi lo hi chu an sawi tel ta chuang lo a,
Bible bu pumpui hi Adama thlahte chanchin chauh chuanna lehkhabu a ni a, Adama
thlah lo pawh an awm tho tihna ni awm takin Gen. 5:1 thu hi hmuh theih a ni.
Chutichuan,
Adama aṭanga Isua Krista thlenga chhuan awm zawng zawng hi chhuan 76 an ni a,
Adama siam zawh a nihna leh khawvel leh thilho zawng zawngte siam zawh an nihna
chu bible mi thiamte chuan Kum B.C 4004 kha niin an chhut chhuak a; chuti a nih
laiin mi thiamte chuan khawvel hi Kum 4,35,00,00,000 (tluklehdingawn li leh
vaibelchhe sawmthumpanga) vela upa a nih tawh thu an chhui chhuah bakah
lehkhabu hrang hrang leh chanchinbu ziak hrang hrang aṭanga kan hmuh dan pawhin
China ramah chuan kum B.C. 5000 velah te khan hmasawnna ropui takin a lo kal
muah muah tawh thu te, Indonesia ramah khian kum 16000 zetah khan mihring an lo
awm tawh thu te, Africa khawmualpuiah chuan kum B.C. 5000 kal taah khan
sabengtung, mi chengte’n an lo chhawr tawh thu te, China ramah chuan Adama pian
hma kum 100 kal taah buh an lo chin tawh thu te leh, India ram ngeiah pawh hnim
(thlai) damdawi hi, “hei hi chu mi na atan a ṭha, chu chu kha mi na atan a ṭha,”
tih ziak sa Adama pian hma kum 150 vel kal taah khan an lo nei dim diam tawh
tih thu te kan hmu a ni.
Tin,
Aigupta mite chanchinah hian, an lal chhungkua inthlah chhâwnga lal chho zel hi
khawvela lal chhungkaw khat inthlah chhâwnga lal rei ber an niin an sawi a;
Jakoba fapa Josepha, Pharoa dawttua lala ṭhu kha a lal hma daih khan Aigupta
lal chhungkaw inthlah chhâwnga lalte chu chuan 1200 (sangkhat leh zahnih)
chhung inthlah chhâwngin an lo lal tawh a nih chu. Isua Krista aṭanga Adama
thleng khân chhuan 76 an tling ve a, chu chu kum 4000 (sangli) chhung a ni a;
chhuan sangkhat leh zahnih chu kum engzat chhung nge ni ang? A rei hle ang chu.
Tin,
a hma lam deuha kan sawi historian pakhat pawh khan Zo hnahthlak zînga hnam
khat, Kom chanchin a ziak pawh kha kum B.C 8000 vel laia Kom (Kâwm) hnam
chanchin a ziak a nih kha. Chu lo lehah chuan kum 1970-ah khan Russia mi
thiamte chuan kum 120,000 kal taa mi kha
nausen thla ruk mi hlum bel chhunga awm chu Siberia ram vawtah an hmu chhuak a
ni (Moscow - July 10, 1977 No.WB/NC II page 1 Col. 1). Heng thil te han
ngaihtuah chuan Adama pian hma hian mihring tam tak an lo piangin an lo thi
tawh a ni tih a lang chiang hle a ni.
59. Zawhna :
Tichuan keini Zofate ngei pawh hi Adama thlah kan ni loin i hre ta a ni maw?
Khawvel siam zawh hun chu a va lo rei tawh awm tak ve maw le! Tun dinhmunah hi
chuan mi tam ber chuan Adama thlah kan ni lo tih hi chu an la awih thei loin a
lang. Adama thlah ni lo awma rinna chu ka hre tawh a, mi ṭhenkhat Genesis bu
chhiartute sawi ka hriat a ni.
Chhanna : Khawvel mi thiamte chhût dân chuan kum
maktaduai 36 hma lamah kha chuan mihring hi an la awm lo tûrah an ngai a. Thil
hi an chhuiin an chhût dik thiam tawh em em mai a, an chhût dik thiam tawh
vânga thlaah leh sikeisenah te pawh lâwnin khâwl te an ṭumtir thei pawh a ni reng a. Bible-a kan awmna lei hi Ni
leh a vela mite’n an hel mup mup anga ngaih dan awm, Josuan Ni a auh din chung
châng thu te kha khawvel Kristian zawng zawngin thu taka ngaia an awih ṭhup lai
pawh khan Grik mi fing, van lam chanchin zirmi khan Niin kan awmna lei hi a hel lo a, kan awmna lei
hian Ni khi a hel zawk a ni tih a han sawi chuan, Pope khan a man a nih kha,
“Bible a kalh, kan thurin a kalh,” an ti mai a nih kha. Mahse tunah chuan
khawvelin kan awmna lei hian Ni a hel a ni tih chu an awih tawh a, Kristian
zawng zawng pawhin an awih tawh a, “Bible a kalh, thurin a kalh,” an ti tawh lo
a nih hi. India mite erawh chuan Isua pian hma kum 250 vel liam ta (B.C.
250)-ah khan kan awmna lei hian Ni khi a hel a ni tih an lo hre tawh tlat a
sin!
Aw
le, tûnah pawh hian keini Zofate hi “Adama thlah kan ni lo,” kan tih hian Zoram
Kristianho hian awih rih lo mah sela, an la hre chiang ang a, an la awih ve
dawn tho tho a ni. Tin, “Adama thlah kan ni lo,” han tih ngawt hian eng nge
awmzia vak a neih? Kan ni lo a nih leh kan ni lo a ni mai a, chu chu kan tan
eng nge ṭangkaina a neih a, kan tan eng nge hnemhnânna a neih? kan ti a ni
thei. “Adama thlah kan ni lo,” tih hi a tawpna a ni nghal mai lo a, keini
Zofateah hian Adama thlaha inruatte leh Israel hnama tel ve anga inngai tlatte
hi Sakhaw pakhat bum thlûkin kan awm alawm. Isua thisena tlan ngaia kan inhriat
tlat avâng hian. Kristianna hian kan hnam hi min bum a ni e.
60. Zawhna : E
khai! Ngawi teh. Ka hre thiam ta uar mai a! Mi hnamin an hnam bawh chhiatna
mawh phura an inhriatnaah zuk tel ve ṭalh kan tum tihna a ni maw? A lo âtthlâk
dâwn mang tak e. Ka harh ta huai mai a!
Chhanna : A nia sin! Hriat hi finna a nih ang bawkin
hriat lohna hi mâwlna a lo ni ṭhin a. Kristian hian Zofate hi min lo bâwih bet
hneh êm avâng hian kan mi fing leh fel tak tak hnam hruaitu hmasate pawh he
sakhua (Kristianna) hian a bual â zo a, kan nih tur ang kan ni pha lo ta ṭhin
a, chu mai pawh ni loin, kan hnam hian kan zia leh nungchang tam tak kan hloh
a, kan zahawmna thlengin kan hloh ta a ni.
61. Zawhna :
A nih leh mihring hi kan thih hnu kan thlarau hi kan thil sual tih rah seng tur
hian Pathian hian min hremin i ring ve em?
Chhanna : Kristian an ni emaw, Judaism an ni emaw,
sakhaw dang bia an ni emaw, kan tisa dam laia mihringin thil sual kan tih chuan,
kan dam lai ngeiin kan tihsual rah chu kan seng ṭhin a, kan seng mek a, kan la
seng zel bawk ang; keini chang lo pawh kan tihsual azirin kan thlahte thleng
pawhin an tuar ang. Kan thih hnuah erawh chuan kan dam laia kan thil sual tih
man chu kan thlarauin a tuar ve lo ang. A chhan chu mihringin thlarau kan
pianpui loh avangin.
62. Zawhna : A
nih leh thih hnua hremna awm tur awm tak khan Kristiante chuan an ruat si a,
Bible-ah pawh khan a sawi a ni lo’m ni?
Chhanna : Bible-ah pawh thih hnua thil sual tih mana
hrem turin a zirtir hauh lo a ni. Bible hi ka chhiar chhuak parh parh ve a,
Apocripha bu an tih te nen hian vawi thum ka chhiar chhuak a, ka hmu ve lo.
Thupuan bu lamah chuan ring lo mi thi tawhte lo tho leh chuan Setana hoa mi
thianghlimte ram hual a, chutah van aṭanga mei lo tlain anmahni a kang ral ta
angin mi tam tak hian an chhiar a. Mi dang lahin thil sual titute chu an thihin
an thlarau chu meidila na tak tuara awm tur angin an sawi bawk.
Mahse
Bible an chhiar sual a ni. Isuan mi hausa leh Lazara tehkhin thu a sawi kha mi
tam berin tak tak angin an suangtuah a, an zeldin chho vel a ni. Kha thil kha
tehkhin thu mai a ni kha. Mihringte an thil sual tih vangin tumah a hrem dawn
lo. Hrem ṭula awmte chu an dam lai ngeiin a hrem ang. “Mei mit thei lo” an sawi
meidil hi Pathian a ni a, Pathian thinurna, mi sualte chunga a thinrimna alh hi
mei angin a sawi mai a ni. Judate sualna avanga phuba laa a hremna pawh kha an
chungah Pathian a thinrim a, A.D. 70 velah khan an hmelmate a thahtir vak a, an
thah bang pawh ram tinah salah an hruai darh a, kha kha Bible-in khawvel tawp
rorelna a sawi kha a ni. Lal Davida chuan,
“Rei
lo tea chinah mi suaksual chu a awm tawh dawn si lo,
A ni, a awmna hmun chu en en mah la, a awm
tawh lo ang,”
a lo ti a (Sam 37:10). chu chu a ni, Bible-a chatuan boralna a sawi chu.
Hrem avanga boral a ni emaw, thi ve hrim hrim emaw pawh chu an thih hnu chuan
hrem leh tur pawh awm tawh chuang loin an boral a, an awm ta lo a ni. Solomona
chuan, “Mihring fate chunga khaw rel leh ramsate chunga khaw rel chu thuhmun
a ni si a, khaw rel thuhmun an chungah a tla a ni; pakhat a thih ang bawkin a
dang pawh kha a thi a; an zain thawk dan thumhun an ni a, mihring chu ramsa
aiin a chungnung lem lo,” a ti a (Thuh. 3:19). A sawi zelnaah chuan,
mihring leh ramsa chu vaivut aṭanga siam vek an nih avangin an thih pawhin an
danglam chuan loh thu a sawi a. “... An zain vaivuta mi vek an ni a, an zain
vaivutah an chang leh vek a ni. Mihring fate thlarau chu chung lamah a chho
emaw, ramsa thlarau chu hnuai lamah leiah a chhuk emaw tih tu nge hria,” a ti
mai a ni. Chuvangin Bible chuan mi sualte thite thlarau chu hremhmun (Meidil) a
tla thla vung vung tur emaw, mi fel, Pathian ringtu thi thlarau chu chung lama
van ram pana chho nul nul tur emaw a awm lohzia a sawi zawk a nih chu. “A
hnua thil lo awmte hmu turin tuin nge rawn hruai kir leh hlei ang?” a ti mai
zawk a ni (Thuh. 3:22).
63. Zawhna : A
nih loh leh Isua thisen khan Adama thlahte sualna chu a thai bo thei tak tak
eng em le?
Chhanna : Chu pawh chu chianga sawi theih a ni lo.
Judaism chuan hman lai lehzualah chuan Messia (Krista) lo kal tur thu an zirtir
ngai lo a. Mahse B.C 586 velah khan Babulon lal chuan Jerusalem rûnin a tichhia
a, Judate chu salah a hruai a. A hnu lamah Persia chuan Babulon a hneh leh a,
Judahote chu Persia rorelna hnuaiah awmin an sakhua te chu an hre ve ta a.
Persia mite sakhua aṭang chuan Messia, Judate chhandamtu tur lo kal tur awm
niin an zirtir ve leh ṭan ta a ni.
Chutichuan
Judaism rin dan chu a tir lama mi ai chuan a suak tial tial a, Judaism rin dân
aṭangin Kristianna hi a rawn peng chhuak leh a ni a; he Judaism aṭang tho hian
Muslim sakhua hi a lo piang chhuak bawk a. Heng sakhaw pahnih Muslim leh
Kristian pawh hi an rin dan a inang lo nuaih mai. Abikin he Kristianna hnuaiah
pawh rin dan inang loin kohhran tam tak a peng hrang ta reng a nih hi. Han
chhuiin han chhût vang vang mah teh. Kan chenna he khawvelah hian Kristian
sakhua an lian ber a, a dawt lehtu chu Muslim sakhua a ni leh a. Khawvel ram
hrang hrang han thlir ila, Kristianna leh Muslim sakhuain hmun a khuar nasatna
zelah inngeih lohna leh tharum thawhna a tam zel a ni. Kristian leh Muslim awm
lohna deuh deuh ramah buaina a tlem deuh zel awm e. Judaism te, Hinduism te leh
Mizo sakhua te hi a din chhuaktu bik sawi tur an awm lo a, Pathian mihringte
hnena a rawn inpuanna thu avangin sakhua hi a lo ding chhuak niin a lang.
Mahse, chu thu chu belhchhah emaw, paih ṭhen emaw, tihdanglam emaw a awm (a
nih) hian sakhua chu a lo suak tial tial ṭhin. Hinduism aṭangin Buddhism a lo
peng chhuak a, Gautama Buddha chuan, “Milem biak loh tur,” ti mah sela, a thih
hnu daihah ama lim siamin amah zuitute chuan an be ta. Judaism aṭangin
Kristianna a lo peng chhuak a, Isuan, “Vana mi chauh lo chu biak loh tur,” ti
mah sela, a thih hnu daihah, amah Isua te, Mary (Isua nu) te an lo be ta hlawm
a ni. Chu vang chuan Isuan Adama bawhchhiatna sual a thai bo anga an sawi pawh
hian a thai bo dan chanchin an sawi dan pawh a inmil thei hlawm lo a nih hi.
Isua lah khan Israel hnam 12 te tan chauha lo kal a nih thu a sawi si a. Israel
ramah a lo piang a, Israel ram chhungah chauh thu a hril a, Israel ramah vek a
thi leh niin a lang a; hei vang hian
Israel mite tan chauha lo kal a nih thu a sawi te hi chu a pawmawm viau
mai. Adama thlahte tana lo kal anga sawi chu a thih hnu lama Isua zirtirna ni
lo lo belhchhah mai a ni tawhin a lang. Tumah a chhandam tak tak ngut pawhin a
lang lo e. Ani pawh a nu leh pa chu Adama thlah an ni ve ve a, Adama kha sual
avanga anchhe dawng a nih chuan ani Isua pawh kha sual vanga anchhe dawng ve
tho a ni tihna a ni a, tu nge maw a chhandam theih bik tehlul ang le?
64. Zawhna :
Isua kha mi ṭha leh thianghlim, sualna nei lo niin an sawi si a?
Chhanna : Isua chu sualna nei lo angin sawi ṭhin bawk
mah sela, Adama kha sualah an puh miau si a, Adama a sual avangin a thlahte
zawng zawng chu suala puh thluk vek, chhandam ngai niin an sawi si alawm. A
hringtute kha Adama thlah tho an ni si a.
65. Zawhna :
Isua kha chu mipa leh hmeichhe inpawlna kara hrin chhuah ni ve loin an sawi a.
A nu kha nula thianghlim (Vergin) a ni a, Joseph-a khan a pawl hmain a rai a,
thlarau thianghlimin a raitir niin an sawi a ni.
Chhanna : Mizo thawnthuah Kungawrhi chu a nu leh a pa
inpawlna tel loa a pa kutzungpui hnai la aṭanga lo piang nia sawi a ni a, chu
chu tak tak ni turin i ruat thei ang em? Chuti ang chiah chuan mipa leh
hmeichhe inpawlna tel loin Mari kha a rai theih i ring em ni? Elizabeti pasal,
Puithiam Zakaria kha Temple-a rawng a bawl hun chhûng a zawh hnu khan inah a
hawng a, ina a awm hnu khan Mari kha Zakaria inah thla thum a va awm a nih kha.
Zakaria fa a pai tih chu a chiang mai lo em ni? Zakaria chu thlarau thianghlima
a khah thu pawh tarlan a nih reng kha. Zakaria kha Levi chi (Puithiam chi) niin
ani pawh Adama thlah bawk a ni. Chuti pawh ni lo mah sela, Mari pawh Juda nula
tho a ni a, Isua kha Mari’n suala a pai ve tho a nih kha. Lal Davida chuan,
“Ka
nu’n sualin mi pai a,”
a ti tlat a (Sam 51:5). Isua pawh kha, “Ziritrtu ṭha...,” tia an koh khan,
“Engati nge ṭha mi tih,” a ti daih kha (Luka 18:18-19; Matt. 19:17). Chu
vang chuan mahni pawh bawh chhiatna sual avanga anchhe dawng ni ve reng chungin
suala tlute chhandam chu a hnai lo a ni.
66. Zawhna :
Bible-ah hian Isua hi sualah chuan an puh ve foin a lang a, mahse suala an
puhna hi dawt leh belh chian dawl lo tak vek a ni zelin a lang a. Dawt sawi leh
mi bum hmangah pawh an puh a, a thiha a thawh leh tur chungchang a sawinaah
pawh tidertua an puh thu i sawi tawh nghe nghe kha. Mahse mi a tihderna dawt a
sawi pawh hi kan hre lem hlei lo a, a ni lo’m ni?
Chhanna : A! Aw. Amaherawh chu a unaute (a pianpuite)
kha chu a bum ve zauh kha maw le. Kut an hman ṭhin pakhat, Bawkte kutah a
unaute khan kal turin an hrilh a, mahse ani Isua chuan a kal dawn loh thu a
hrilh a. Chutia a unaute Bawkte kut hmang tura an kal liam hnu chuan a rukin a
kal ve leh ta si a nih kha (Joh. 7:1).
67. Zawhna :
Isua kha a thi a, a tho leh niin an ziak a, a tho leh tak takin i ring em?
Chhanna : Mitthi thawh leh thu hi Judaism sakhuaah
te, Kristian sakhuaah te leh sakhaw dang dangah a awm ṭhin awm e. Tak tak nge
tak tak lo tih chu kan va fiah phak lo miau si alawm le.
Isua
khan mitthite kha a kaitho a, zawlneite pawh khan mitthi an lo kaitho ve bawk
a; chung chu thu hran lo ni ta sela, amah a thi a, a lo tho leh anga ziak hi
kei chuan ka ngaihtuahna aṭang chuan ka awih lo a ni. Isua thawh leh thu an
sawi khan a tho leh taksa hmu chianga insawite kha mi tlem te an ni a, mi tam
takin hmu ve sela chuan a awihawm deuh
dan a awm thei ang. An khenbeh thu kha
chu Muslim-ho chuan, “Isua kha an khengbet lo a, a aiah Pathian Allah khan a
khawngaih em avangin mi dang a khenbehtir a ni,” an ti asin! Khatih hun lai
khan ruang ruk hmang an awm avangin Isua ruang nia an sawi pawh kha a
zirtirte’n an ruk bo mai an hlau a, thlan kha an ventir a ni reng a.
68. Zawhna :
Isua chanchin hi kum 12 a nih aṭanga kum 30 a nih inkar hi Bible-ah a awm lo an
ti a, kha mi hun chhung khan hmun dangah a awm tihna em ni?
Chhanna : E! ka hre lo le. Mi ṭhenkhat chuan Kashmir
ram velah te hian Isua hi a chetla hle ni tein an sawi a, nupui te neiin fa
pawh nei deuh duaha sawi thawm a awm a ni. Ziak ṭhenkhatah pawh, Japan ramah a
kal a, nupui te neiin fa pawh a nei a, a bo leh ta daih nia sawi thawm pawh a awm
bawk. Engpawh ni se kei chuan Isua hi min tlantu tura lo kalah ka ruat lo a, an
thlahtu bawhchhiatnaah ka tel bawk lo a, an thlah zingah ka tel lo tlat a.
No comments:
Post a Comment